நடந்து முடிந்த தேர்தலும், முஸ்லிம்களின் நிலைபாடும்!

நடந்து முடிந்த தேர்தலும், முஸ்லிம்களின் நிலைபாடும்!
மரியாதைக்குரிய சிந்தனை சிற்பிகளான இளைஞர்களே ! இம்மடல் காணும் உங்கள் அனைவரின் மீதும் இறைவனின் சாந்தியும் சமாதானமும் உண்டாவதாக (அஸ்ஸலாமு அலைக்கும் வரஹ் …)!
இம்மடலை பொறுமையுடன் படித்து நடுநிலையோடு சிந்தித்து நல்லதொரு முடிவுக்கு வருவீர்களானால் … இன்ஷா அல்லாஹ் நாளைய வெற்றி நமது சமுதாயத்திற்கே! நமது நாட்டின் 15வது மக்களவை தேர்தல் சிலருக்கு வெற்றியும் பலருக்கு தோல்வியுமாய் முடிந்து விட்டது. தமிழகத்தைப் பொருத்தவரைக்கும் முஸ்லிம் லீக்கின் சார்பில் சகோதரர் N.M.அப்துல் ரஹ்மான் அவர்களும் காங்கிரஸ் சார்பில் J.M.ஹாரூன் அவர்களும் வெற்றி பெற்று தமிழக முஸ்லிம்களின் சார்பில் பாராளு மன்றத்தில் இடம் பிடித்து விட்டனர் அல்ஹம்துலில்லாஹ்!
தமிழகத்தில் செயல்படும் நூற்றுக்கணக்கான முஸ்லிம் கட்சிகள், அமைப்புகள், இயக்கங்களிடையே இந்திய யூனியன் முஸ்லிம் லீக் சார்பில் மட்டுமே ஒருவர் வெற்றி பெற்று பாராளுமன்றம் சென்றுள்ளார். மற்றவைகளுக்கு அரசியல் அங்கீகாரம் கிடைக்கவில்லை என்பது ஒரு புறம் இருந்தாலும் கிடைத்த அங்கீகாரத்தையும் பயன்படுத்த தவறிய தமுமுகவின் மனித நேய மக்கள் கட்சியை நினைத்து நெஞ்சம் வேதனைப்படுகிறது. தற்போதைய அரசியலில் வேகத்தை மட்டும் வைத்து களமிறங்காமல் விவேகத்தையும் பயன்படுத்தினால் மட்டுமே வெற்றி பெற முடியும் என்பதுதான் கண் கூடான உண்மை!
இந்த வாய்ப்பைத்தான் முஸ்லிம் லீக் சமயோசிதமாய் செயல் படுத்தி ஒதுக்கப்பட்டது ஒரு தொகுதியானாலும் அதில் வெற்றி வாகை சூடி விட்டது. ஆனால் நேற்று கட்சி ஆரம்பித்து தங்களின் முழுமையான பலம் என்னவென்பதை (4 தொகுதியில் போட்டியிட்டு மொத்தமே 66 ஆயிரம் வாக்குகள் மட்டுமே ம.ம.கட்சி பெற்றிருந்தது) தெரிந்து கொள்ளாமலேயே எடுத்தேன், கவிழ்த்தேன் என தகுதிக்கு மீறிய வகையில் சீட் பேரம் நடத்தி முடிவில் கிடைக்க விருந்த ஒரு தொகுதியையும் இழந்தது மட்டுமல்லாமல் கையில் இருந்த வக்ஃபு வாரியத்தையும் பறி கொடுத்து விட்டு,தேர்தல் நாளன்று ஆளும் கட்சியினரோடு வன்முறை யிலும் ஈடுபட்டு அதில் நமது சகோதரர்கள் 6 பேர் இரத்தம் சிந்தியது, இந்த வன்முறையை கண்டித்து தமிழகத்தில் ஆங்காங்கே ஆர்ப்பாட்டம் நடத்தி அதில் ஆளும் கட்சியினரை அநாகரீகமாக வசை பாடியதன் மூலம் இராமநாதபுரத்தில் மட்டுமே 100-க்கும் மேற்பட்டோர் மீது போலீஸ் வழக்குபதிவு செய்து தற்போது தேடப்படும் குற்றவாளிகளாக ஓடி ஒளிந்து வரும் நிலையை தொண்டர் களுக்கு ஏற்படுத்தியது போன்ற தமுமுகவின் அரசியல் செயல்பாடு அறிவுடையதா? அல்லது எந்த வன்முறைக்கும் இடம் கொடுக்காமல் கிடைத்த ஒரு இடத்தையும் யாரையும் வசைபாடாமல் கண்ணியமான முறையில் பிரச்சாரம் செய்து லட்சத்திற்கும் மேற்பட்ட வாக்குகள் வித்தியாசத்தில் வெற்றி வாகை சூடியுள்ள முஸ்லிம் லீக்கின் அரசியல் செயல்பாடு அறிவுடையதா? என்பதை உங்களின் மனச்சாட்சிக்கே விட்டு விடுகிறேன், நல்ல தீர்ப்பு வழங்குங்கள் !
பிற கட்சி சின்னத்தில் போட்டியிடுவதால் முஸ்லிம் லீக் தனது கெளரவத்தை இழந்து விடும் என நினைப்பது எவ்வகையில் நியாயம்? 100 ஆண்டு கண்ட நமது தாய்ச்சபை முஸ்லிம் லீக் இன்று வரைக்கும் தனிச்சின்னத்தில் போட்டியிட்டு வெற்றி பெற முடியாமல் போனதற்கு யார் காரணம்? கேரளாவில் மட்டும் அன்றிலிருந்து இன்று வரை தனிச் சின்னத்தில் போட்டியிட்டு 10-க்கும் மேற்பட்ட எம்.எல்.ஏக்கள், இரண்டு எம்.பிக்கள் என முஸ்லிம் லீக் தொடர்ந்து வெற்றி பெறுவதற்கு யார் காரணம்? எல்லாம் உங்களை போன்ற இளைஞர்கள் தான்! காரணம்!! கேரளாவில் இயக்கங்கள் பல இருந்தாலும் அரசியல் என்று வரும்போது முஸ்லிம் லீக்கின் தலைமையில் அம்மக்கள் ஒன்று திரண்டு விடுகின்றனர், வெற்றியும் பெறுகின்றனர். ஆனால் தமிழ்நாட்டில் அரசியல் ரீதியாக முஸ்லிம் லீக்கில் ஒன்றிணையாமல் ஆளுக்கொரு கட்சி ஆரம்பித்து ஆளுக்கொரு கூட்டணியில் சேர்ந்து கொள்கின்றனர். இந்நிலை நீடித்தால் இன்னும் 100 ஆண்டு களானாலும் முஸ்லிம் லீக் மட்டுமல்ல எந்த இயக்கமும் தனிச்சின்னத்தில் போட்டியிட்டு எந்த வெற்றியையும் பெற முடியாது!
தமிழக முஸ்லிம்களிடம் குறிப்பாக இளைஞர் களிடம் நான் மிகவும் பணிவோடு கேட்பதெல்லாம் நீங்கள் எந்த இயக்கத்திலும் இருந்து கொள்ளுங்கள். அதன்மூலம் சமுதாய பொது சேவையாற்றுங்கள். வரவேற்கிறோம்! ஆனால் தேர்தல் அரசியல் என்ற நிலை வரும்போது மட்டும் கேரளாவைப் போல இயக்கத்திற்கப்பால் முஸ்லிம் லீக் என்னும் ஒரே குடைக்குள் நுழைந்து விடுங்கள். பின்னர் முஸ்லிம் லீக்கின் வளர்ச்சியை பாருங்கள். தமிழகத்தின் அனைத்து அமைப்புகளின் சகோதரர்களும் அரசியல் ரீதியாக முஸ்லிம் லீக்குடன் இணைந்து செயல்பட்டால் போதும் இன்ஷா அல்லாஹ் எதிர்வரும் சட்டமன்றத் தேர்தலில் தனிச்சின்னத்துடன் 20-க்கும் மேற்பட்ட இடங்களில் போட்டியிட்டு மிகப்பெரிய வெற்றியையும் பெற்று விடலாம்!
சகோதர சமுதாயத்தின் நிலையை பாருங்கள், R.S.S, விஸ்வ ஹிந்து பரிஷத், இந்து முண்ணனி, பஜ்ரங்தளம், சிவசேனை போன்ற பல இயக்கங்களாய் செயல்பட்டாலும் தேர்தல் வரும் போதெல்லாம் ஒன்று திரண்டு பி.ஜே.பிக்கு ஆதரவு கொடுப்பதால் தான் இரண்டு முறை மத்தியில் ஆட்சி அமைக்கும் அளவுக்கு தாமரையாய் ஜொலித்தார்கள். இதைப் பார்த்தாவது நமது சமுதாயம் திருந்தாதா? இன்ஷா அல்லாஹ் திருந்தும் என்ற நம்பிக்கையோடு தான் இம்மடலை எழுதியுள்ளேன். படியுங்கள், சிந்தியுங்கள், தமிழக முஸ்லிம்களின் ஒரே அரசியல் களமாக முஸ்லிம் லீக் மட்டுமே இருக்கட்டும். எல்லோரும் முஸ்லிம் லீக்கில் இணைந்து ஒன்றுபடுவோம், வெற்றி பெறுவோம்! நாளைய விடியல் தமிழ் முஸ்லிம் சமுதாயத்தின் வெற்றியாக இருக்கட்டும். நமது சமுதாயத்தின் அரசியல் உயர்வையும், உரிமையையும் அடைவதற்காக “ஏணி” காத்திருக்கிறது. முஸ்லிம் லீக் என்னும் ஏணியில் ஏறி சிகரத்தை வெல்வோம். வாருங்கள் தாய்ச்சபைக்கு, இணையுங்கள் தாய்ச்சபை சகோதரர்களோடு இன்ஷா அல்லாஹ் நாளைய ஆட்சியும் அதிகாரமும் நம்முடையதாகட்டும்! ஆமின்!!


சமுதாயக் கவலையுடன்

மெளலவி கீழை ஜஹாங்கீர் அரூஸி

துபை

தொடர்புக்கு; Cell: 050-7959960