கேரள முஸ்லிம் லீகும், தமிழக முஸ்லிம் லீகும்

கேரள முஸ்லிம் லீகும், தமிழக முஸ்லிம் லீகும்

http://asifmeeran.blogspot.com/2009/05/blog-post_17.html

நடந்து முடிந்த நாடாளுமன்றத் தேர்தலில் செங்கொடித் தோழ்ர்களுக்குக் கிடைத்த மரண அடியில் நிலைகுலைந்து போயிருக்கிறார்கள் அவர்கள் - கேரளத்தில் மார்க்ஸிஸ்ட் கட்சிக்குள்ளேயே நடந்த குடுமிப்பிடி சண்டை , தோழமை கட்சிகளுக்கிடையேயான தகராறு, தோழர்களின் அராஜகப் போக்குகள் எல்லாமாகச் சேர்ந்து எதிர்பார்த்த முடிவுகளையே தந்திருக்கிறது. கேரளமாவது எதிர்பார்க்கப்பட்டதுதான். ஆனால் மேற்கு வங்கத்தில் மகா கூட்டணிக்கு முன்னால் மார்க்சிஸ்டுகள் சிதறு தேங்காய் போலச் சிதறிப் போவோமென்று தோழர்கள் கருதவேயில்லை.

யாருக்கு எப்படியோ, இந்திய யூனியன் முஸ்லீம் லீகைப் பொறுத்தவரை கேரளத்தில் இந்தத் தேர்தல் வாழ்வா சாவா மரணப் போராட்டமாக இருந்தது.


மதானி மார்க்ஸிஸ்டுகளோடு கைகோர்த்துக் கொண்டு முஸ்லீம் லீகை கடுமையாக விமர்சிக்க, மதவாதிகளோடு கைகோர்த்துக் கொண்டதாக காங்கிரஸ் மார்க்ஸிஸ்டுகளைச் சாட இம்முறை மதானியின் உணர்ச்சிமிக்க உரைகள் முஸ்லீம் லீகின் கோட்டைகளான பொன்னானி மற்றும் மலப்புரம் தொகுதிகளை உடைத்து விட்டுத்தான் மறுவேலை செய்யப் போகிறதென்று ஊகங்கள் உலா வந்தன.

'சிவப்பணிகிறது மலப்புரம்' என்று செங்கொடித் தோழர்கள் உற்சாக முழக்கமிட கடந்த தேர்தலில் ஒரே ஒரு இடத்தோடு தேங்கி நின்றதைப் போல இம்முறை நிகழ்ந்து விடக் கூடாதென்பதில் முஸ்லீம் லீக் உறுதியாக இருந்தது. அதன் தலைமை அதற்கான தீவிரப் பணிகளை முடுக்கி விட்டது. கட்சியின் அடிமட்டம் வரை நிர்வாகங்க்ள் தேவைக்கேற்ப மாற்றப்பட்டன. அதிருப்தியாளர்களை மீண்டும் கட்சியை நோக்கி இழுக்கும் முயற்சிகளை தலைமையே நேரடியாக மேற்கொண்டது. மலப்புரம் 'சிகப்பணியாமல்' பச்சை போர்த்திக் கொண்டேயாக வேண்டுமென்ற உறுதியோடு மிகத் தீவிரமாக தொண்டர்கள் இயங்கினார்கள்.


'இம்முறை கேரளத் தேர்தலில் மிக கடுமையாக உழைத்தவர்கள் முஸ்லீம் லீகைச் சேர்ந்தவர்கள்தாம்' என்று செஞ்சட்டைத் தோழர்களே தயக்கமின்றி ஒப்புக் கொள்ளுமளவிற்கு இழந்ததைத் திரும்பப் பெறும் கனவோடு மிகக் கடுமையான உழைப்பை முஸ்லீம் லீக் மேற்கொண்டது.

கேரளத்தைப் பொறுத்தவரை வடக்கு கேரளமான மலப்புரம் இசுலாமியர்கள் அதிகம் வாழும் இடம். எங்கே எந்த அலை வீசினாலும் மஞ்சேரி, பொன்னானி போன்ற இடங்களில் லட்சக்கணக்கான வாக்குகள் வித்தியாசத்தில் லீக் வேட்பாளர்கள் ஜெயிப்பதென்பது எழுதப்படாத சட்டமாக இருந்தது

குறிப்பாக பொன்னானி 77இல் இருந்து தொடர்ந்து முஸ்லீம் லீக் வேட்பாளர்களையே தேர்வு செய்து வந்திருக்கிறது. பனாத்வாலா தொடர்ந்து இந்தத் தொகுதியிலிருந்தே தேர்ந்தெடுக்கப்பட்டு வந்திருக்கிறார்.

ஆனால், லீக் பணக்கார இசுலாமியர்களின் அரசியல் புகலிடம் என்ற கடுமையான குற்றச்சாட்டுடன் லீகைச் சேர்ந்தவர்களே வெளியேறியதும், லீக் இரண்டாகப் பிளவுபட்டதும், ஜமாத் தே இஸ்லாமி போன்ற அமைப்புகளும் இயங்கத் துவங்கியதும் முஸ்லீம் லீகைப் பலவீனப்படுத்தின என்றாலும் மஞ்சேரி (இப்போது மலப்புரம்) அசைக்க முடியாத பெருங்கோட்டையாகவே இருந்து வந்தது சென்ற தேர்தல் வரைக்கும்.

ஆனால், கடந்த நாடாளும்ன்றத் தேர்தலில் சுழன்றடித்த செங்காற்றின் முன்னால் பச்சைக் கொடி பதறிப் போனது. வெளியுறவுத்துறை இணை அமைச்சராக இருந்த ஈ.அகமது மட்டுமே பொன்னானி தொகுதியில் அசையாமல் நிற்க முடிந்தது. - கடந்த தேர்தலில் மஞ்சேரி தொகுதியில் லீக் தோல்வியடைந்தது அவர்களுக்கு மிகப் பெரும் அதிர்ச்சியை அளித்திருந்தது.
அந்தத் தேர்தலில் இரண்டு இடங்களில் இருந்தும் 7,33,228 வாக்குக்ளை மட்டுமே பெற்றிருந்த லீக் இம்முறை கடுமையாக உழைத்து தனது மலபார் (மஞ்சேரி), பொன்னானி என்ற தனது இரண்டு தொகுதிகளையும் மீண்டும் தக்க வைத்துக் கொண்டதென்பதோடு இம்முறை கடந்த முறையை விட சுமார் 80,000 வாக்குகள் அதிகம் பெற்றுக் கொண்டதென்பதும் குறிப்பிடத் தகுந்தது.


கடந்த முறை பொன்னானி தொகுதியில் லீகின் சார்பில் வெற்றி பெற்ற ஈ.அகமது இம்முறை மலபாரில் போட்டியிடத் தீர்மானித்ததும், அவர் பயந்து ஓடுவதாக செந்தோழர்கள் பரிகசித்தார்கள். ஆனால், பொன்னானி லீகின் கோட்டை என்பதால் இழந்து விட்ட மலபார் தொகுதியை மீட்பதற்காகவே ஈ.அகமது போன்ற சக்திவாய்ந்த வேட்பாளரை அங்கே நிறுத்துவதாக லீக் சொன்னது. சொன்னதைப் போலவே பொன்னானியை நிலை நிறுத்தியதோடு, இழந்து போன மலபார் தொகுதியையும் ஒரு லட்சத்துக்கும் அதிகமான வாக்குகள் வித்தியாசத்தில் லீக் நிலைநிறுத்திக் கொண்டது கம்யூனிஸ்டுகளை பெரும் கவலைக்குள்ளாக்கி யிருக்கிறது.


அதோடு மட்டுமல்லாமல் சமீப தொகுதிகளான கோழிக்கோடு, வயநாடு, வடகரை, கண்ணூர் போன்ற தொகுதிகளில் காங்கிரஸ் வெற்றி பெறவும் முஸ்லீம் லீகின் உழைப்பும் ஆதரவும் பெரும்பங்கு வகித்திருக்கிறதென்று காங்கிரஸ்காரர்கள் சொல்வதில் இருக்கும் உண்மையை அரசியல் வல்லுனர்கள் ஆமோதிக்கிறார்கள். இதுதான் செஞ்சட்டைத் தோழர்களுக்குப் பெரும் தலைவலியாகவும் தொடங்கியிருக்கிறது.


இந்தக் கதைகளைச் சொல்வதற்கு நான் முஸ்லீம் லீக் ஆதரவாளன் என்பது காரணமில்லை. கேரளத்தில் இசுலாமியர்களுக்கென்று பாரம்பரியமான தொகுதிகளும் அதில் உறுதியான வெற்றி வாய்ப்புகளும் தொடர்ந்து இருந்து வந்திருக்கின்றன. ஆனால், தமிழகத்தில் நிலை அவ்வாறில்லை. ஏதேனும் திராவிடக் கட்சிகளின் சார்பில் ஒரு இடத்தைக் கேட்டு பெறுவதே கூட முஸ்லீம் லீக்கின் பெரும் சாதனையாக இருக்கிறது.

இந்த நிலையில் துபாயில் இஸ்லாமிய வங்கியில் அதிகாரியாகப் பணியாற்றி வரும் அப்துல் ரஹமான், வேலூர் தொகுதியில் தொகுதிக்குப் புதியவ்ரென்றாலும் முஸ்லீம் லீக் சார்பாகப் போட்டியிட்டு ஒரு லட்சத்துக்கும் அதிகமான வாக்குகள் வித்தியாசத்தில் வெற்றி பெற்றிருப்பது மிகுந்த மகிழ்ச்சி தருவதாக இருக்கிறது.
பெரும் காங்கிரஸ்தலைகளே உருண்டு விட்ட நிலையில், வென்றவர்கள் கூட குறைந்த வாக்கு வித்தியாசத்திலேயே தலை தப்பியிருக்கிறார்கள் என்ற சூழலிலும் பதிவான வாக்குகளில் 50 சதவீத வாக்குகளுக்கும் அதிகமான வாக்குகளைப் பெற்றதன் மூலம் மிக உறுதியான வெற்றியைப் பெற்றிருக்கும் சகோதரர் அப்துல் ரஹ்மானுக்கு நெஞ்சம் நிறைந்த நல்வாழ்த்துகள்!!


நேற்று தொடங்கிய கட்சிகளெல்லாம் தங்களது சொந்தச் சின்னத்தில் தேர்தலை மேற்கொள்ளும்போது பாரம்பரியம் மிக்க கட்சியாக தன்னை முன்னிறுத்தும் இந்தியன் யூனியன் முஸ்லீம் லீக் தமிழகத்தில் நடைபெறும் அடுத்த தேர்தலிலாவது தனது சொந்தச் சின்னத்தில் நின்று வெற்றி பெற வேண்டும் என்பதுதான் என் போன்றவர்களின் விருப்பம்.